Digital SAT haqqında tez-tez verilən suallar

Digital SAT xaricdə, daha çox Amerika Birləşmiş Ştatlarında yerləşən universitetlərə müraciət etmək üçün təşkil olunan imtahandır. Daha əvvəl kağız üzərində keçirilən bu imtahan, sonralar rəqəmsal formatda keçirilməyə başlamışdır ki, bu da öz növbəsində bir sıra sualların ortaya çıxmasına səbəb olmuşdur. Gəlin tələbələri maraqlandıram və tez-tez qarşılaşdığımız bu suallara nəzər salaq.

Digital SAT imtahan formatı necədir?

Digital SAT iki bölmədən : oxuma-yazma və riyaziyyat bölmələrindən ibarət olub, ümumilikdə 2 saat 14 dəqiqə davam edir. Hər bir bölmə iki moduldan ibarətdir və suallar asandan çətinə doğru tələbələrə təqdim olunur.

Oxuma və yazma bölümü

54 sualdan ibarət bu bölmə ümumi imtahan müddətinin 54 dəqiqəsini təşkil edir. Bölmə tələbələrdən mətn parçalarını oxuyaraq onları analiz etməyi və mövcud yanlışlıqları düzəltməyi tələb edən, eyni zamanda tələbələrin oxuyub anlama, məzmun qiymətləndirməsi və uyğunluq qurma kimi bacarıqlarını test etməyə yönəlmiş suallardan ibarətdir.

Riyaziyyat bölümü

Bölmə 44 sualdan ibarətdir və imtahanın 70 dəqiqəsini təşkil edir. 

Riyaziyyat bölümü hər biri 35 dəqiqə təşkil edən və 22 sualdan ibarət 2 modula bölünmüşdür.Tələbələrin riyazi düşünmə, problem həlli və analiz bacarığını qiymətləndirmək məqsədi ilə tərtib olunan suallardan ibarət bu bölmə riyaziyyatın aşağıdakı əsas istiqamətlərinə yönəlmişdir:

-Cəbr 

-Qabaqcıl riyaziyyat 

-Problem həlli və məlumatların təhlili

-Həndəsə və triqoniometriya

Bluebook nədir?

Bluebook tələbələrin SAT və digər imtahanlarda  iştirakını təmin edən, eyni zamanda imthanların rəqəmsal formada təşkilinə imkan verən bir platformadır. Collage Board tərəfinfən təqdim olunan bu platforma Test Day Toolkit adlı veb tətbiqi ilə inteqrasiya olunur. Bu tətbiq imtahanın planlaşdırılması, materialların tələbələrə təqdim olunması, imtahan müddətinə nəzarət  və.s kimi bir çox imkanlarla həm tələbələrin, həm də mərkəzdə fəaliyyət göstərən əməkdaşların işini xeyli asanlaşdırır.

İmtahan zamanı hansı cihazlardan istifadə etməliyəm?

SAT imtahanının rəqəmsal formata keçirilməsi imtahanla bağlı bir sıra dəyişikliklərin ortaya çıxmasına səbəb oldu ki, bunlardan ən əsası imthanın kağız üzərində deyil, online iştirakı təmin edən cihazlar vasitəsilə keçirlməsi ilə əlaqədardır. SAT-in rəqəmsal formada keçirilməsinə baxmayaraq, tələbələr imtahana əvvəlki kimi imtahan mərkəzində qatılmalıdırlar. Onlar aşağıda qeyd olunan cihazlar vaistəsilə imtahda iştirak edə bilərlər :    

-Özlərinə məxsus və ya mərkəz tərəfindən idarə olunan Windows noutbukları və ya planşetləri 

-Şəxsi və ya mərkəz tərəfindən idarə olunan Mac noutbukları və ya iPadlər”i 

-Mərkəz tərəfindən idarə olunan Chromebook’lar (tələbələr şəxsi Chromebook ilə imtahanda iştirak edə bilməz)

Yuxarıda göstərilən cihazlardan  heç birinə sahib olmayan tələbə cihazla təmin olmaq üçün “Collage Board” a müraciət edərək, müvəqqəti cihazla təmin oluna bilər.

Digital SAT imtahan qiymətləri nə qədərdir?

Tələbələri ən çox maraqlandıram məsələlərdən biri də, Digital SAT imtahanında iştirak üçün ayrılan vəsaitlə bağlıdır.İmtahanda iştirak üçün lazımi ödəniş 2 hissəyə ayrılır : zəruri ödənişlər və əlavə ödənişlər.

 Zəruri ödəniş, qeydiyyat zamanı hər bir tələbənin ödəməli olduğu ödənişdir. Bu məbləğ 60 $ təşkil edir, lakin, imtahana Amerikada qatılmayacaq tələbələrdən əlavə 43 $ tələb olunur. Əgər, Amerikadan başqa bir ölkədən imtahana qatılırsınızsa, qeydiyyat üçün ödəməli olduğunuz ümumi məbləğ 103 $ təşkil edir.

 Əlavə ödənişlər tələbələrin imtahan nəticələri və ya müraciətlə bağlı əlavə xidmət aldıqda ödəməli olduğu ödənişlərdir. Bu ödənişlərə aşağıdakılar aid olunur :  

– Qeydiyyatın gecikməsiylə bağlı ödnəniş : 30$ (Son qeydiyyat tarixindən sonrakı gecikmiş son qeydiyyat tarixinə qədər müraciətlər üçün )

– İmtahan mərkəzini dəyişdirmək üçün ödəniş : 25 $

– Qeydiyyatı ləğv edib ödənişin qaytarılması – 25$ ( qeydiyyatda dəyişiklik üçün nəzərdə tutulan son tarixə qədər)

– Qeydiyyat ləğvi üçün gecikmiş müraciət -30$ ( son dəyişiklik tarixindən sonra, imtahan günündən əvvəlki cümə axşamı 23:59-a qədər)

– Əlavə bal – hər ərizə üçün 14$ (imtahandan sonraki ilk 9 gün içərisində sifariş etsəniz, ilk 4 imtahanınız üçün bu xidmət pulsuz olacaq)

– Təcili ərizə- 31 $

– Balları telefonla almaq – hər müraciətə 15$

– Arxivlənən ballar- 31 $

Digital SAT də qiymətləndirmə necə aparılır?

İmtahanın ümumi balı 1600 olaraq müəyyən edilmişdir və bu bal iki əsas bölmə arasında bərabər şəkildə paylanmışdır. Hər bir bölmə üçün maksimum bal 800-dür. İmtahanın orta balı 1050 hesab edilir və bu baldan yüksək nəticə göstərən tələbələrin balı ortalamanın üzərində performans hesab olunur.

Hansı bal müraciətimin uğurlu olması üçün kifayətdir?

Tələbələri ən çox maraqlandıran suallardan biri də, hansı balın onların uğurlu müraciət nəticəsi üçün kifayət olacağı ilə bağlıdır. İmtahandan yığmalı olduğunuz ideal bal, müraciət etmək istədiyiniz universitetlərin tələblərinə görə dəyişə bilər. Məhz buna görə də, gələcəkdə təhsil almaq istədiyiniz universitetlərin qəbul şərtləri haqqında araşdırma etməyiniz, ideal balın təyin olunması üçün faydalı hesab olunur. Müxtəlif məlumat mənbələrindən istifadə edərək araşdırma apara bilər və ya xaricdə təhsil mərkəzlərindən də yardım ala bilərsiniz.